Gisulat ni John Carlo Beronio • April 14, 2026

Fiction/Literary • Poetry

Dili mokanta ang kulasisi;

hinuon, magdikit ilang balahibo

samtang nagdula sa sanga,

maghunghong og awiton

para ra sa usa’g usa.

Nag-ambit-ambit og santol

gikan sa punuang ilang gibisita,

samtang nagtimbaya og pahiyom,

mahilayo sa tanang makakita.

Magsinungugay og dula

ug sa kasambungan magtago,

sama usa ka magtiayong anaa

sa landong ra magtagbo.

Sa matag lukso padulong sa lain,

ilang mga pako moagik-ik og katawa,

apan kon naa’y tingog nga mosangpit,

kalit lang silang mawala.