Ginsulat ni Nery Joy Ochea • May 22, 2026

Fiction/Literary • Poetry

Unta kun ako in magbugsay,

An akon lawas magmalipay.

An Ginoo an akon ginlalauman,

Pero maaram ako nga waray gud patutungdan.

Unta kun ako in magbugsay,

Umuyon unta an akon kalugaringon.

Ha pagkayana manggud nga panahon,

Diri ako maaram hino an lilingion.

Pastilan nga kinabuhi,

Waray na gud ba hingangadtuan?

An akon kalag in gin u-uyon

Ha akon waray na pag-asa nga paglaum.

Unta kun ako in magbugsay,

Makit-an ko an ngaran han kabubuwason.

Kay nabido na an kasing-kasing,

Namatay han kagab-ihon.

Diri gad ako nasabot,

Kun mayda pa ba manggud nasasalin.

Ha akon lawas—

Nga diri natitiman-an hin maupay.

Nasasalin nga kunuhay,

Katalwasan ha kakurian.

Duro an kapyot han kapakyasan,

Ngan ine an akon lugod ginlalauman.

Pastilan nga kinabuhi,

Anya na daw an sunod hine?

Kamatayon manggud ba han sanbuwas,

An nakulob ha akon dughan?

Pastilan! Pastilan!

Butangi gad hin pawa

An akon nagsisisirum nga gugma

Didto ha kabutngaan han pagluya.

Unta ha sunod ko nga pagbugsay,

In akon masakay ha bangka,

An kalipay san Ginoo,

Nga akon haharukan hasta hit kalunod ko.