Ginsulat ni Nery Joy Ochea • June 29, 2026

Non-fiction • News

QUEZON CITY — Nagpakita hin suporta ha LGBTQ+ community an multilingual P-pop boy group nga ALAMAT dida han LoveL4ban, usa nga Pride Month protest ngan music festival nga ginpahigayon didto ha University of the Philippines Diliman hadton Hunyo 27.

Iginpakita han ALAMAT an mga yinaknan nga Binisaya dida ha LoveL4ban pinaagi han ira mga t-shirt nga may nakasurat nga “I love you” ha ira tagsa-tagsa nga yinaknan. An lead vocalist nga hi R-Ji, nga tikang ha Borongan, Eastern Samar, nagsul-ot hin t-shirt nga may nakasurat nga “Higugmaon Taikaw,” bersyon ha Waray; samtang hi Alas, nga tikang ha Davao, nagsul-ot hin “Gihigugma Taka,” bersyon ha Cebuano. An iba pa nga mga miyembro nagsul-ot man liwat han pareho nga mensahe ha ira tagsa-tagsa nga yinaknan, sugad han pagpasidungog ha ira mga pinagtikangan.

Dida han ira pagpasundayag, gin-awit han ALAMAT an Hiraya, nga kilala han damo ha LGBTQ+ community tungod han mensahe han libre nga paghigugma. An ira kanta nga Maharani, nga ginpagawas han 2022, gintatagad man han iba nga fans sugad nga usa nga “lesbian anthem.” Usa liwat han mga miyembro han grupo, hi Jao, inapi han LGBTQ+ community.

Nagkarawat liwat an mga miyembro hin nagkakalain-lain nga Pride flags tikang ha ira mga fans ngan ira ini ginwagayway dida ha entablado. Hi Mo an nagdara han gay flag, hi R-Ji han pansexual flag, hi Jao han Progressive Pride flag, hi Taneo han transgender flag, hi Tomas han bisexual, ngan hi Alas han lesbian flag.

Pinaagi han ira musika, kultura, ngan paggamit han nagkakalain-lain nga yinaknan han Pilipinas, padayon nga iginpapakita han ALAMAT an ira suporta ha LGBTQ+ community ngan an mensahe han gugma, pagrespeto, ngan inklusibidad para han ngatanan.

---

MAHITUNGOD HAN TAGSULAT

Hi Nery Joy Ochea usa nga parasurat nga natawo ngan nagdako ha Leyte, ha Rehiyon han Sinirangan han Kabisay-an (Eastern Visayas). Ha pagka yana, na iskwela hiya ha Biliran Province State University ha probinsiya han Biliran, samtang nagsisilbi nga administrative intern ha Singapore. Lakip han iya mga iginpublikar nga libro an Quill of Written Voices ngan Yesterday’s Written Butterflies, nga available ha United Kingdom ngan United States pinaagi han Waterstones, ngan iba pa nga partner han publisher hine.

(Waray-language biography by Nery Joy Ochea)