Words by Jubert Cabrezos • November 10, 2026
Fiction/Literary • Poetry
I. Pantalan
Dugmok na ang akong mga dunggoanan
sa sige’g pagbunal sa mga balud gikan
sa Luok sa Gingoog. Dugay na akong
banhod. Naanad na sad ko sa taya
sa akong kabilya. Usahay kadungog ko
sa mga bosina sa mga sikad. Abi nako
gitawag ko nimo. Nahinumdom ko niadtong
hapona nga nidunggo ka sa akoa, nagbugas-bugas
ang imong singot. Nag-istorya ka kanako
nga nakit-an nimo ang imong kauban
sa MV Estrella del Mar. Nalunod siya sa lawod.
Walo ka gatos ka tawo ang namatay. Basig
magsara na ang kumpanya nimo ug himoon ka’g
scrap metal, ingon nimo. Sulod sa tulo ka bulan,
nakadunggo ka sa akoa. Pero gipabalik ka sad
sa Manila. Tulo ka dekada na ang niagi.
Gihuwat pa tika.
II. Sálop sa Kalubihan sa Bulwâ
Usa ka lubi ang nahulog
apan wala’y atiman ang báka,
sige’g kaon lang sa sagbot. Pero
midagan ang tikling nga nakugmat.
Abohon na ang langit. Nagsampit na
ang mga kuliklik og mga kauban
para sa gabii. Tuku… Tuku, ang abiso
sa tuko sa akò. Wala na’y tawo diri.
Gikuha na sa mga pastol
ang ilahang mga baka. Basig kani
ang kalibutan nga nakit-an
sa akong mga katiguwangan:
Hayahay—
Peaceful kaayo.
III. Ilalom sa Bawokbawok
Nahurot na ang dalag sa adlaw—
gihalog na sa pula ang kahil
nga mipintal sa linaw nga balud.
Gibira sa piskador ang iyang balsa
padulong sa ilalom
sa kahoy nga bawokbawok.
Nagpakita’g tabonon
ang mga dahon. Usa
ka balde lang sa bangsi
ang iyang gipukot.
Gitanggal niya ang kalo
ug nag-ampo apan wala’y
nakadungog kay
gisakmit na sa balud
ang iyang mga hunghong.
(Hulagway gikan kang Ramius Aquiler/Pexels)
BAHIN SA MANUNULAT
Si Jubert Cabrezos usa ka magbabalak gikan sa Medina, Misamis Oriental. Natawo siya sa Cagayan de Oro ug nagdako sa Caloocan. Niadtong 2026, ang iyang balak sa pinulongang Esperanto nga Praatomo nakadaog sa Unang Premyo sa Balak sa Belartaj Konkursoj (“Kompetisyong Belyas-Artes”) sa Graz, Austria.
Leave a Reply