Gisulat ni Kregian Vareare Miral • June 15, 2026
Fiction/Literary • Poetry
Gadamgo ko nga ako gabarog tunga sa dalan,
Sulod sa ako’ng lawas ug gikalimtan nga pangan.
Ako’ng dunggan napuno sa gasiyagit nga kadaghanan
Nga nag nilabaya’y og bato tungod sa ila’ng gikagubtan.
“Ipasa na! Ipasa na!
Ato na’ng kuhaon ang tingog sa ila’ng mga dila!
Ato na’ng kuhaon ang kusog sa ila’ng mga istorya!
Ato na’ng itahi patak-om ang ila’ng mga baba!”
Singgit sa mga nakaputi nga galingkod sa ila’ng trono
Dayo’ng tuman sa mga nakauniporme nga tig “protektar” sa mga tawo
Ila’ng gipanakop ang tanan, labi na ang mga kritiko,
Ug ang mga dili uyon sa ila’ng pagdala sa gobyerno.
Ila’ng gipangbunalan ang mga dinakpan ug gisulod sa prisohan
Aron didto tiwason ang “interogasyon” nga wala’y kahumanan.
Ila’ng gipamusil ang mga mopalag atubangan sa katilingban
Ug gitawag nga “terorista” ang mga kinabuhi nga ila’ng gikalasan.
Napuno ang nasud sa kahadlok tungod sa panghitabo
Ug napugos ang mga sibilyan nga motago sa mga suok
Aron dili maplanteran ug “ebidensiya” nga wala’y ayo,
Aron dili makulatahan sa mga puthaw nga kumo,
Aron dili mabuthan sa mga tingga nga tudlo;
Nagpakabuhi ang mga tawo sama sa mga ok-ok.
Pagkahilom sa shinagitay ug pagkahawan sa aso,
Ako’ng nakita ang mga nakabuy-od nga mga tawo.
Ako’ng nakita ang pagdagay-dagay sa ila’ng mga dugo
Ug ako’ng nakita ang mga luha nga wala nakatulo.
Gadamgo ko nga ako gabarog tunga sa dalan,
Sulod sa ako’ng lawas ug gikalimtan nga pangan.
Ako’ng dunggan napuno sa gasiyagit nga kadaghanan
Nga nag nilabaya’y ug bato tungod sa ila’ng gikagubtan.
Ug sa kinailawman sa ako’ng dughan ako’ng madunggan
Ang hilak sa mga bata, tiguwang, amahan, inahan, ug tibuok katawhan
Nga nag bakho ug nag ingon:
“Gipasa na… gipasa na… kay nisugot ra man ta
Nga ila’ng kuhaon ang tingog sa ato’ng mga dila,
Nga ila’ng kuhaon ang kusog sa ato’ng mga istorya,
Nga ila’ng itahi patak-om ang ato’ng mga baba.”
BAHIN SA NAGSULAT
Si Kregian Vareare P. Miral kay usa ka mambabalak. Kauban niya sa pagsulat ang The Stray Poets, usa ka grupo sa Sugbo. Adtong 2017, 2nd place siya sa Poetry Night at Garden ug nakadaog sa Bahugbahug Balak pagka 2018. Makit-an pud nimo si Kreigan diri:
Leave a Reply